آلمرحوم عبدالله بن عبدآلعزيز آلعليوي - منتديات أسرة الصريخ بمحافظة عنيزة بمنطقة القصيم بالمملكة العربية السعودية

21-03-2011, 01:48 AM

السسلآم عليكم صبآح آلخير
حبيت آشآرك معكم بمآ آنوهـ قسسم آلشعر وآلقصيد
ليتي شآعر ولله بس حبيت آنزل موضوع عن آلشآعر آلمرحوم <عبدآلله بن عبد آلعزيز آلعليوي> رحمه الله / وعطيكم نبذه عن آلشآعر

سيرة آلشآعر : ولد الشاعر عبد الله بن عبد العزيز العليوي عام (1373هـ) "يرحمه الله" في مدينة عنيزة ،وتلقى تعليمه الإبتدائي والمتوسط في مديينة عنيزة ، وتخرج من ثانوية عنيزة العامة من قسمها الأدبي . ومن ثم التحق في بداية عمله الوضيفي بأحد البنوك الوطنية (البنك العربي) . وبرز رحمه الله كلاعب كرة قدم في النادي العربي في عنيزة إلا إن موهبته سرقته من معشوقة الملايين .
- حصل على جائزة القصة القصيرة على مستوى المملكه العربية السعودية في منتصف التسعينات الهجرية ، وجاءت تحت عنوان ( لمحة وفاء ) وتدور فكرتها حول قصة شاب يتيم تبرع بكليته لشقيقه اللذي قرر الزواج .
- عمل مشرفاً ثقافياً في النادي العربي ، وكان شعلة نشاط وحماس ، فحقق ناديه في ذلك الوقت العديد من الإنجازات الثقافية سواءً داخل منقطة القصيم أم خارجها .
- عمل في القطاع الحكومي في مديرية الزراعة والمياه في عنيزة قبل أكثر من سبع سنوات إلا إن معاناته مع الفشل الكلوي أجبرته على الاستقاله قبل أن يكمل عامه الثاني .
- تم تكريمه من قبل فرع جمعية الثقافه والفنون في منطقة القصيم بصفته شاعراً مبدعاً ومثقفاً بارزاً في المنطقة .
-صدر له أول ديوان مسموع بصوت الأستاذ محمد الرشيدوأيضاً صدر لـه أول ديوان مطبوع جاء تحت عنوان ( بقايا شوق ) ضم أكثر من (72) قصيدة . وله ايضاً محاولات في الشعر الشعبي الحديث .
- وتغنى له الكثير من الفنانين أمثال ( عبد الله الصريخ ، سلامة العبد الله ، حمد الطيار ،فهد العبد الله ، رباب ، سليمان الهندي ، خالد عبد الرحمن ، صالح الجبري )
- في بداية شهر شوال للعام الهجري (1424هـ) صدر لـه ديوان مسموع ومرئي بواسطة أقراص ( سي دي ) وشرائط ( الكاسيت ) و ( الفيديو ) . وضم هذا الإنتاج المتميز أكثر من عشرين قصيدة ، وقد أعده وأشرف عليه الشاعر : يوسف بن محمد المطلق ، وقام بهندسته الصوتيه والمؤثرات الشاعر : علي بن مد الله المد الله ، والقاه : إبراهيم بن علي الصيخان ، واخرجه فيديو : عبد الله بن محمد الخيفان ، وحيث قدمة هذه النخبه من الأسماء هدية جميلة للشاعر عبد الله بن عبد العزيز العليوي قبل وفاته " رحمه الله " بشهر ونصف تقريباً وعند عرض هذا العمل المتميز عليه ومشاهدته له ذرفت عيناه واكتفى الشاعر عبد الله العليوي بعد الموافقه في طرح هذا العمل بطبع قبلة حانية على جبين من قدموا لـه هذا الإهداء والإنتاج المتميز .

وفي يوم الخميس الموافق 2/11/1424هـ في تمام الساعة الثانيه وخمس واربعون دقيقة خيم الحزن على مدينة عنيزة بخبر وفات الشاعر عبد الله بن عبد العزيز العليوي رحمه الله وأسكنه فسيح جناته .

من قصآئده رحمة الله عليه /

محاولة نسيـان حبـك وطاريـك
أكبر خطاء فكرت به في حياتـي
حبك سطابي حطني بين أياديـك
صار إندفاعي لك من أبرز صفاتي
ابيع كل الناس يازيـن وأشريـك
وشوف في نظرة عيونك غناتـي
ليت الهموم تصيب قلبي وتخطيك
ما اقول قلي من يسوي سواتـي
يزداد حبـي لـك بزايـد تغليـك
حسيت إني فيـك حققـت ذاتـي
-----------------
ياليتني ماشفت زولك ولا جيـت
دربك ولا شافت عيوني عيونـك
ليتي معك بالمعرفة مـا تماديـت
ليت الظروف وسود الأيام دونـك
من قبل أشوفك ليتني عنك صديت
قبل تمكـن بالضمايـر طعونـك
الوقت ما جالي على مـا تمنيـت
خلن بحالي ما ترجيـت عونـك
يا زين من طول المشاوير مليـت
يا مشغل قلب شقا فيـك هونـك
وين أنت أنا لك تالي الليل ناديت
حتى السهر ماله حـلاة بدونـك
----------------
ما بقى بي حيل للجرح الجديد
جرحك اللي فات توه مابـرا
صارت الأيام مثلـك ياعنيـد
عن جروح القلب قلبك مادرا
من خطاك العام حاول تستفيد
وادفن الذكرى القديمة بالثرا
يوم قلبي عنك مايبعد بعيـد
وأنت قلبك بالهوى باع وشرا
ليت من ينساك في حبٍ جديد
ليت حبك ما على بالي طـرا
----------------
لاوحيت لك طاري مع الناس فزيت
حبك بقلبـي مـا طوتـه الليالـي
كني فطيـمٍ فارقـت أمـه البيـت
ولا لقـى قلـبٍ بدالـه مـوالـي
يا منيتي من عقبك الناس مليـت
مالي بغيرك يـا حسيـن الدلالـي
بأقرب قريب لي من الناس ضحيت
وارخصت من شانك عزيز وغالي
الله يشهـد مـا بحبـك تسليـت
واليـوم قلبـك غيرتـه الليالـي
اشقيتني في عيشتي مـا تهنيـت
وأنت بعذابـي مستريـح وخالـي
نسيت حبي كيف عنـي تخليـت
حطمت قلبـي يالغضـي عزتالـي
حطمت قلبي في عذابـي تماديـت
ليتك ترى في غيبتك وش جرالي
-------------------
منك انتهينا يـا مخيـب رجانـا
الصبر طال وعذبتنـا المشاويـر
في موت حبك يجبر الله عزانـا
بيدك رميته لا تقـول المقاديـر
لولاك حنـا مـا تبـدل غلانـا
كل الوفاء منا ولا منـك تقديـر
قلنا سحابة صيف تعبـر سمانـا
وتزول ماله في سماء الحب تأثير
غدرك على نسيان حبك حدانـا
هذي سواتك ماتفيـد المعاذيـر
عفناك واللي عالـمٍ فـي خفانـا
البعد عنك أرحم وقلبك مع الغير
تبيعنـا واليـوم تبكـي هوانـا
لا يا عديم القلب فرقاك لي خيـر
-----------------
خايف عليك ومنك بالحيـل خايـف
عزي لقلبي يجمع الحـب والخـوف
خليت قلبي والشقـاء بـك ولايـف
قلبي عمى وش عاد لو عيني تشوف
عمري قضى ماقلت لك واحسايـف
عندي نهايه درب الاشواق معروف
جرحت قلبي يـا عديـم الوصايـف
ماظن تشرح ما بقلبي لـك حـروف
قلبي لغيـرك لـو تغليـت عايـف
حبك ملك قلبـي ونسانـي الخـوف
------------------
وين أنت يا مشكاي عيني مشقـاة
في حب خـلٍ دمعتـي يـوم عيـده
ودي بنسيانـه ونسيـان مـافـات
وابدا من أول فـي حيـاة جديـدة
وأقول ياقلب الشقـاء حبنـا مـات
ميـر الله أقـوى ذكرياتـه عنيـده
يخطي واسامح وأذرف الدمع بسكات
نفس الخطا فـي كـل يـوم يعيـده
أدري لقلبه في هوى الغير نوهـات
وما كل نفس تأخـذ اللـي تريـده
ما تبعد الغالين ... طول المسافـات
جسمي بعيدٍ عنـه والقلـب بيـده
--------------------
حاول تقدر موقفي لـو تكرمـت
من شان ماض راح تسمع دفاعي
قبل الزعل ليتك لوضعي تفهمـت
ما بيننا عشرة عمر لو تراعـي
تراك في حكمك علينا تسرعـت
خلك حليم ولا تصيـر اندفاعـي
كان الخطى مني فأنا لك تعـذرت
قلبك عطوف و ما يسرك ضياعي
دامك بقلبي من إسنين تحكمـت
ما شوف لهروج تجي منك داعي
كل الهموم أنساه لا مـن تبينـت
أهواك أنا مهما تكون اندفاعـي
------------------
قالوا سعيد بالهوى قلت بالحيـل
سعادتي ماينـدرى وش وراهـا
دربي صعيب وتحسبونه تساهيل
محد شكى من جمـرة ماوطاهـا
كل ٍ مريح ياعرب تالـي الليـل
وانـا بحـالٍ يعلـم الله شقاهـا
فكرت لو يطري على الزين تبديل
كيف اقدر الفرقا واعيش بعناهـا
اهواه من قلبي ومن غير تعليـل
لا تجبرون الروح تبدي خفاهـا
ياماكتبت اسمه على نجمة اسهيل
أصل بنور العين عالـي سماهـا
----------------
قلي على الله وابتعد عنك وارتـاح
قلي على الله بس من غير تجريح
من شب نار الشوق ياشوق ماصاح
واللي وطاها يشرح الجيب ويصيح
لولا الغلا ماهانت النفـس ياصـاح
محبتـي لـك ماوراهـا مصاليـح
وشلون تنسى يالغضي كل مـاراح
مركب غرمك سار مع وجهت الريح
القلب في يمينك ياعزوتـي طـاح
حنا على شط الرجاء بك مجاريـح
جرحتني واحسبك للقلـب جـراح
اشوف بعيونك على الصد تلميـح
-----------------
مدري متى صارت جروحي تسليـك
عقب الوفاء وشلون غرتـك دنيـاك
يا من علي اليـوم كثـرة طواريـك
نهايـة الغـدار مـاظـن تخـفـاك
في حبك الثاني عسـى الله يهنيـك
حنـا مـع الأيـام ندلـه وننسـاك
كنت الرجاء واليوم خاب الرجاء فيك
أرخصت ماضينـا وغيـرت مبـداك
وين الحنان اللـي مقـره موانيـك
وين الضمير اللي عن الغدر ينهـاك
غال الدموع أرخصتها لك وأنا ارجيك
ابني لـك بدمعـي وتهـدم بيمنـاك
يكفين مـا قاسيـت منـك و تغليـك
منتب علـى قلبـي وصـي ومـلاك
------------------
أنا تعلمت الجفاء مـن تغليـك
ومن المذلة والخضوع انتهينـا
من كل قلبي يشهد الله ناسيـك
غير الضياع بحبكم وش لقينـا
ابحتفظ في عزة النفس مابيـك
بالناس نلقى اللي نبيـه ويبينـا
مما معي زينت للنفس ماضيـك
في درب حبك ليتنا مـا مشينـا
هديت عرش الحب يازين بايديك
من بحر حبك بالنجـاة اكتفينـا
ذاب الحنين بعين قلبٍ تراعيـك
مثلك على النسيان والله قوينـا
أنهيت قصة حبنـا فـي تغليـك
أمسح دموعك بالجفاء ما بدينـا
------------------
منتب على خبري تغيرت بالحيل
مهوب قول الناس شوفة عيوني
مثلت لي دور المحبيـن تمثيـل
رح كمل المشوار هالحين دوني
دامه حصل بالوضع يازين تبديل
في عزتي للنفس هجرك يهوني
ماقلت يوم أقفيت ماطولك ياليـل
مابيك دام الغير بـك شاركونـي
شكيت جرحٍ من سواياك لسهيل
لاشك نجم سهيل زود شجونـي
مليت أنا ما عاد أبي منك تعليـل
خلك مع اللي في هواك إحسدوني
--------------------
داويت بالنسيان قلبٍ جرحتيـه
دفنت أنا حبي وتبقـى حياتـك
ياللي قتلتـي حبنـا مارحمتيـه
أنتي تحسبين الهوى حب ذاتك
ياللي سمعتي بالهوى ماعرفتيه
أنتي تبين الحب درب لغناتـك
نسيت حبك ضاع كل الرجاء فيه
يكفيك عن حبٍ مضى ذكرياتـك
درب النهاية بختيارك مشيتيـه
لا تذرفين الدمع هذي سواتـك
عهد الهوى اللي بيننا ماحفظتيه
رماك في بحر الضياع التفاتـك
باقي بقايا حبنا اللـي رفضتيـه
ترى المحبه ماتوافق صفاتـك
مليت أنا مشوار حبٍ رسمتيـه
قلبي يعيش أفراح ذكرى وفاتك
---------------------
تذكرتك وقلبي مسرف الخطوه يبي فرقـاك
وفي نفسي بقايا من جروح العـام مدفونـه
تذكرتك وفي عيني مواري حزن من ذكراك
تلفت يمك الخافق وجـاك خطـاه مجنونـه
وجيتك ثاير العبره احبك من يقول انسـاك
غيابك نار من يقوى يشيل النـار بعيونـه
هلا با ايامك السوداء هلا بالحزن في دنياك
رضى قلبي بتعذيبك ابـد مايطلـب العونـه
متى تفرح بك ايامي متى وشلون كيف القاك
متى هالليل في شمسك يذوب ويختلف لونه
تعبت من التعب وينك تعال ومد لي يمنـاك
حياتي لا خلت من شوفتك ماهيب مضمونـه

المواضيع المتشابهه:

الموضوع الأصلي: آلمرحوم عبدالله بن عبدآلعزيز آلعليوي || المحرر: حمد محمد آلصريخ || المصدر: منتديات أسرة الصريخ

www.alsuraikh.com

كلمات البحث

العاب ، برامج ، سيارات ، هاكات ، استايلات

21-03-2011, 02:38 AM

يعطيك العافية لطرحك الرائع

تحيتي لكـ

21-03-2011, 02:39 AM

يعطيييك الف عااافيه
الله يرحمه ويغفر له ويسكنه فسيح جناته
ومن المصادفات ان اشتهرت روايته التي تدور احداثها حول الفشل الكلوي
وحقق بها اعلى الجوائز
وهو توفي بالفشل الكلوي
غفر الله له واسكنه جنته
وكرر شكري لك

22-03-2011, 03:50 AM

يعآفيك ربي آخوي محمد

والله يرحمه ويغفرله يآرب

وششكرآ ع آلمرور

الإهداءات
إضافة إهداء